TÜRK BALASI

TÜRK DÜNYASI UŞAQ ƏDƏBİYYATI

حیله‌گر تولکو

+0 BƏYƏN
حیله‌گر تولکو
مؤلیف: گولزار ایبراهیمووا

سیخ مئشه‌نین چوخ دار بیر جیغیریندا

راست گلدی آج تولکو قورخاق دووشانا

شیکارینی هئچ کس آلماسین،دئیه

آپارماق ایسته‌دی اؤز یوواسینا

گیریب تولکولوگون اصیل دونونا

او بئله سؤیله‌دی عاوام دووشانا:

-دئیه‌سن سنین ده بیر کیمسن یوخدور

یازیغین بیریسن، درد سرین چوخدور

اورگیم پارتلاییر منیم آز قالا

من اؤزوم مؤحتاجام دوغما باجی‌یا

نه اولار آللاهدان بیر باجیم اولا

دردیمی دئینده منی آنلایا

تولکو بونو دئییب چوخلو آغلادی

«تنها جانیم» –دئیه او زیریلدادی

دووشان دا اینانیب تولکو فعلینه

آلداندی تولکونون یاغلی دیلینه

تولکو ایله دووشان دوست اولدو بئله

بئله دوستلوق هئچ بیر واخت دوشمز اله.

دوستلار سئوینه‌رک توتوب ال-اله

گئتدیلر مئشه‌نی،چؤلو گزمه‌یه

چاتدیلار بیر گؤزل، صفالی گؤله

بیردن تولکو تزه بالیق ایسته‌دی

چاغیردی، کؤمه‌یه حیله‌سی گلدی

تولکو دئدی: ایندی کی، بیز دوغماییق

بوندان بئله بیز هر شئیه اورتاغیق.

باجی گرک قارداشلا مالین بؤله،

من سندن بؤیویم، قولاق آس سؤزه!

منیم اوشاقلیقدان باش آغریم واردیر،

هله قولاغیمین بیری ده کاردیر،

بالاجا اولاندا سودان قورخموشدوم،

من اوندا آز قالا لاپ بوغولموشدوم

ایندی گرک سن گیره‌سن بو گؤله،

سن بالیق توت، من ده سالیم وئدره‌یه.

گؤل بالیغی دادلی اولور یئمه‌یه

دییشمه‌رم من بالیغی هئچ نه‌یه.

سفئه دووشان تئز هر شئیه اینانیردی،

او تولکونو اصل بیر دوست سانیردی.

بوتون گونو قالیب او سویوق گؤلده،

بالیق اوولایاراق وئردی تولکویه.

تولکو ایسه کؤلگه‌ده اوتوراراق،

دووشان توتان بالیقلاری یئییردی

اورگینده «آخماق دووشان» دئییردی

آخیر کی، دووشانین هئیی قالمادی

سودان چیخدی، آما چوخ سویوقلادی

تیتره‌ییب سویوقدان او اسه-اسه

وئدره‌نی بوش گؤردو، قانمادی نسه

بیر ده باخدی، گؤزونه اینانمادی

یاتمیش تولکو اویاندی بیردن سسه

گؤردو یانینداکی ایسلاق دووشاندی

بوزوشه‌رک او بیر بالیق ایسته‌ییر

اوتاناراق «یامان آجمیشام»، دئییر.

تولکو اونو «گؤرمه‌میش» آدلاندیردی

دئدی یاش دووشانا: -بسدی، عاییبدی،

بیز بو گون نه تاپدیق، اونو دا یئسک

بس بونون قیشی وار، سونرا نئیلریک؟

همین بالیقلاری من دوزلامیشام

و باسدیریب من قیشا ساخلامیشام.

ایندی بیز آز یئسک، قناعت ائتسک

قیشدا بول-بول یئییب، کئف چکه‌جه‌ییک

او دانیشیر، دووشانی آلدادیردی

دووشان دا چوخ دیقتله قولاق آسیردی

تولکو سسین گئت-گئده قالدیریردی

قارنی ایسه یئمکدن پارتلاییردی

اونلار قاییتدیلار یووالارینا

دووشان آج قارینا اوزاندی، قالدی

تولکو آجگؤزلوکله دووشانا باخیب

فیکیرلشدی-«کاش دووشان ساغالایدی،

صاباحکی ناهاردا منیم اولایدی»

دووشان سودا لاپ چوخ قالمیشدی دئیه

اونا گؤره یامان آزارلامیشدی

صوبحه‌دک او یازیق گؤزون یوممادی

سحری ده یاتاغیندان قالخمادی

بوتون گونو آغرییاراق، زاریدی

آج-سوسوز اوزانیب یئرینده قالدی

-«قارداش»، دئیه او دوستونو چاغیردی

تولکو اونا طرف هئچ بویلانمادی

دوردو سحر تئزدن چیخدی آرادان

همین گون او کئیفیندن ده قالمادی

گؤلده چیمیب، اوزاناراق قارالدی

بیردن حیس ائتدی کی، یامان آجیییب

دووشان اتیندن یئمک آرزولادی.

یازیق دووشان اوزانیب زاریییردی

هارایینا بیر کیمسه ده چاتمیردی

بو واختی بیر ایلان کئچیردی اوردان

دیکسیندی دووشانین آه-و زاریندان

یاخینلاشدی اونو اودماق ایسته‌دی

سونرا دا اودقوندو، فیکرین دَییشدی

قوی ساغالدیم، سونرا من اونو یئییم.

یئدیگیمین قوی بیر دادینی بیلیم

ایلان زهرینین گوجون بیلیردی

بوتون آغریلارا او درمان ایدی

گوجلو زهر چوخ تئز تاثیر ائدیردی

زهر سورتدو او دووشانین اوستونه

بیر آزجا گؤزله‌دی ساغالسین –دئیه

دووشان ایسه قیزدیرمادان یانیردی

حالسیزلیقدان گؤزونو ده آچمیردی

چوخ کئچمه‌دی تولکو آجیب قاییتدی

ایلان اونو گؤروب آرادان چیخدی

تولکو چاتان کیمی دوستون آرادی

دووشانی گؤرن تک آغزی سولاندی

شیکارینی او لذّتله یالادی

ناهارینا باشلامامیشدان اوّل

فیکرینی سؤیله‌دی دووشانا بئله

دوزدو، باجی من، اعتیبارلیسان

آما گل اینجیمه سن چوخ دادلیسان

دووشان ائشیدنده بو کلمه‌لری

آنلامادی اونون دئدیکلرینی

گؤزلرینی دؤیدو هئچ-نه قانمادی

تولکو ایسه ناهارینا باشلادی

همین آندا بیردن قورودو قالدی

تولکو یالایارکن اؤز شیکارینی

زهرله‌دی بیلمه‌یه‌رک قانینی

دووشانین اوستونه سورتولن زهر

یاواش-یاواش اؤز ایشینی گؤرموشدو

تولکونون جانین زهر بوروموشدو

ائله بیل کی، تولکو چوخدان اؤلموشدو

آما دووشان یئنه هئچ نه قانمادی

عاواملیقدان دوشمنین تانیمادی

ساچین یولوب «قارداش» دئیه آغلادی

تولکویه یاس توتوب، ماتم ساخلادی

باشینا دا قارا یایلیق باغلادی

هر ایکی دوست بئله‌لیکله آیریلدی

کیم نه‌یه لاییقسه پایینی آلدی

دووشان خئییر تاپدی تمیزلیگیندن

تولکو ده محو اولدو تولکولوگوندن

هر کیمسه دوستونا خیانت ائتسه

شئیطانلار فیرلانار احاطه‌سینده

همین کسین بوندان باشی فیرلانار

اؤزو ده بیلمه‌دن یئره چیرپیلار

دوستا صادیق اولان دایم اوجالار

او اؤز شؤهرتییله گؤیلره قالخار .

قایناق: سئحرلی دونیا ژورنالی
کؤچورن: عباس ائلچین


BÖLÜM : Şeir, Nağıl,