+0 BƏYƏN
آذربایجان
اود اورکلی ، اود نفسلی دیاریمسان
اوجاغینا جانیم قوربان ، آذربایجان !
ازیلسن ده ، اَییلمه‌ین ووقاریمسان
بو چاغینا جانیم قوربان ، آذربایجان !
ساواش‌لاردان آلنی‌آچیق چیخان زامان
تاریخ‌لره باغیشلادین نئچه قوربان.
هر قونشودا بیر پارچاسی اسیر قالان
تورپاغینا جانیم قوربان ، آذربایجان !
نئچه گیزلی ثروت یاتیر قوجاغیندا ،
نئچه اؤلکه اود آپاریر اوجاغیندان .
آزادلیغین آل رمزی وار بایراغیندا
بایراغینا جانیم قوربان ، آذربایجان !
هر اوغورون گله‌جگه بیر یول آچیر ،
هر دوست ائله خوش نیتین ایشیق ساچیر .
هر میلّته ، هر مذهبه ایستی ، آچیق
قوجاغینا جانیم قوربان ، آذربایجان !
نریمان حسن‌زاده