ساتین آلنان عاقیل 

بیر بار إکن، بیر یوْق إکن، قادیم زاماندا بیر غاریپ أر-عایال بار إکن. بۇلار گیجه-گۆندیز هارس اۇرۇپ ایشله‌سه‌لر-ده ایکی چاغاسینی إکلأپ بیلمأن، قاراگۆنه قالیپ یؤرنمیشلر. گۆنلرینگ بیرینده أری عایالینا: 
– من بیله‌کی اوْبالارا آیلانیپ گؤره‌یین، مۇنیمیزدان دۆشه‌وۆنتلیرأک ایش تاپسام، گؤچۆپ گیده‌لی – دیین. 
عایالی: 
– گیتسنگ گیت. آیلانیپ گؤر، بلکی، قوْوی إکلنچ تاپارسینگ – دیییپدیر. 
غاریپ قوْنگشۇلاریندان اۆچ تنگگه قارض آلیپ، یوْلا دۆشۆپدیر. بیرنأچه اوْبانی آیلانیپ، ایلینگ نأهیلی إکلنچ إدیأنینی گؤرۆپدیر. یؤنه هیچ یرده-ده بوْله‌لینلیک یوْقدۇغینا گؤز یتیریپ، اؤز ایلینه دوْلانیپدیر. اوْل یوْلدا بیر آقساقغال آداما دۇشۇپ، حال-آحوال سوْراشیپدیر. اؤزۆنینگ إکلنچ گؤزلأپ چیقاندیغینی آیدیپدیر. آقساقغال اوْنگا: 
– عاقیل ساتیان، اوْغلۇم، إکلنچدن قالدیم – دیین. 
– عاقیلی نأچه‌دن بریأنگ؟ 
– بیری بیر تنگگه. 
غاریپ اوْنگا بیر تنگگه بریپدیر ولین، آقساقغال: 
– گۆنۆنگ یاشان یرینده یات – دیین. 
– باریمی شۇ؟ 
– هاوا، بیر تنگگه دۆشیأنی شوْل. 
غاریپ ینه بیر تنگگه بریپدیر ولی، قوْجا: 
– میهمان بوْلان یرینگده یاری‌گیجه‌دن سوْنگ یات – دیین. 
غاریپ بارجا پۇلۇنی حارچلاپ، قوْجا بیلن ساغ‌بوْللاشیپدیر-دا، یوْلۇنی دوْوام إدیپدیر. اوْل گۆن یاشاندا بیر اوْبانینگ چتیندن باریپ، بیر کمپیرینگکیده میهمان بوْلۇپدیر. قوْجانینگ برن عاقیلینی یاتلاپ، غاریپ یاری‌گیجأ چنلی یاتماندیر. گیجه یاریما یِتی‌برنده، داشاردا حیشی-ویشی سس إشیدیپدیر. غاریپ یۇواشلیق بیلن تۇرۇپ، پنجیره‌دن سِرإتسه، ایکی آدام بأش دۆیه یۆپک پارچانی گتیریپ، کمپیرینگ آغیلینینگ داشیندا اۆیشۆپ دۇران درسینگ آشاغینا سۆسدۆریپدیرلر-ده، اۆستۆنه چؤپ-چالام تاشلاشدیریپ گیدیپدیر. غاریپ مۇنی کمپیره-ده آیتمان، یرینه گچیپ یاتیپدیر. إرتیر حانینگ یاساوۇللاری: 
– کیمینگ میهمانی بار بوْلسا، کیم دِل آدام گؤرسه، کؤشگه آلیپ بارسین – دیییپ، اوْباما-اوْبا آیلانیپ باشلاپدیرلار. دِل آدام بوْلسا، کؤشگه إلتیلیپدیر. کمپیرم غاریبی آلیپ باریپدیر. 
حان: 
– پیلان یۇرتدان گلن آبرایلی سؤوداگأرینگ بأش دۆیه یۆپک پارچاسی اوْغۇرلانیپدیر. هایسینگیز آلان بوْلسانگیز آیدینگ. بوْلماسا، هامینگیزی کۆله سِردیررین – دیییپ، ییغنانان آداملارا هایبات آتیپدیر. هیچ کیمدن سس چیقمانسوْنگ، غاریپ: 
– اوْنی اؤزۆم-أ آلاموْق. آلانی–دا تۇتۇپ بریپ بیله‌جک دأل. یؤنه حاریتلاری تاپیپ برگین – دیییپدیر-ده، اوْنۇنگ بۇقۇلان یرینی گؤرکزیپدیر. حان اوْنگا بیر ییل گۆزران گؤرر یالی آلتین بریپدیر. غاریپ اوْنی آلیپ: 
– سؤودا جۆپۆنه دۆشدی – دیین. 
حان غاریبینگ بۇ سؤزۆنه گنگیرگه‌نیپ: 
– اوْ نأهیلی سؤودا؟ – دیییپ، مۆنگکۆرلیک بیلن إنگیپدیر. غاریپ اوْنگا عاقیل سؤوداسی بارادا گۆررۆنگ بریپدیر ولی، حان گۆلۆپ، هزیل إدینیپدیر. اوْنگا ینه بیر قیسیم آلتین بریپدیر. 
بوْش جۆبی آلتیندان دوْلانسوْنگ، غاریبینگ گؤونی گؤتریلیپ، بازارا ایلغاپدیر. دیلی سۆیجأن غاریپ، نار ساتیپ اوْتۇران بیرینینگ یانینا باریپ: 
– ایشسیزلیکدن إلیم گیجأپ دۇر، یاشۇلی! ایش بار بوْلسا، مۇغت إدیپ برگین – دیییپدیر. بۇ شادییان کیشی نار ساتیان قوْجا دییسنگ یاراپدیر-دا: 
– حاقینگی اۆستۆنینگ ساغ‌بوْلی بیلن بررین. گچ، هانی، ترِزینگ باشینا. من بیر یاپلانیپ چای ایچه‌یین – دیین. 
غاریپ قوْجانینگ نارینی ساتیپ بریپدیر. اینگ سوْنگۇنا گزک گلنده، قوْجا "بۇ چاغالارینگا" دیییپ، اوْنگا إصلیجه نار بریپدیر. 
اوْل ییلدان – بۇ ییلا نار دادیپ گؤرمه‌یأن چاغالاری غاریبینگ گؤزۆنینگ اؤنگۆنه گلیپ، بگِنجینه اؤکجه‌سی یره دگمأن، ینگیل قوْپۇپ، بازارا آیلانیپدیر. بۇ یردن آلیبیلن زادینی آلیپ، قۇش بوْلۇپ اۇچۇپ، غاریپجا چاتماسینا یتیپدیر. هنیز اللرینه آلتین پۇل دۆشۆپ گؤرمه‌دیک أر-عایال اؤرأن بگه‌نیپدیر و چاغاجیقلارینی ناهارلاپدیر. 
شیله‌لیکده، بۇ أر-عایال چاغاجیقلاری بیلن آقساقغال قوْجادان ساتین آلان عاقیلینینگ آرقاسیندان حوْر-زار بوْلمان، باغتلی یاشاپدیرلار. 

کؤچۆرن: عباس ائلچین

[A:آ،ا - Ä: أ - E:إ، ه - U: ۇ - O: وْ- Ü: ۆ - Ö: ؤ - I:ی - Y:ی]