+0 BƏYƏN
بارماق اویونو
بارماق اویونو - آذربایجاندا ان چوخ یازقاباغی (بایرام قاباغی) گونلرده اساساً اوشاق و گنجلر آراسیندا، گئنیش شکیلده اوینانیلان قدیم اویونلاریندان بیریدیر.
عومومی معلومات
بو اویون بعضی بؤلگه‌لرده "ساناما" ،"بارماق سانادی"، بعضی بؤلگه‌لرده ایسه "ایینه-ایینه" آدلاندیریلسادا اساساً "بارماق اویونو" آدلاندیریلیر.
اویونون قایدالاری
بیر نئچه اوشاق جمع اولوب ساناما یولو ایله اوستا(باشچی، یا موللا) سئچیرلر.
اوشاقلار اللرینی آچیب اوز اوسته یئره قویورلار. سونرا اوستا(باشچی، یا موللا) آشاغیداکی سؤزلری دئییر و هر بارماغین اوستونه بیر هئجا(کلمه) ایله ایشاره ائدیر.
ال-ال- الـله‌نه .
سن وورگینن چپنه،
الدن چیخدی کپنه،
شاه، شوخ، شاها باجی،
موللا دئدی، چک الینی.
بعضاً اللری یئره قویاندان سونرا اوستا(باشچی، یا موللا) یوخاریداکی سؤزلرین عوضینه آشاغیداکی سؤزلری (ساناما) سؤیله‌یرلر:
بر، بر اینجی،
بر کشینجی،
شام آغاجی،
شاتیر کئچی.
قوز آغاجی،
قوتور کئچی.
هاپپان،
هوپپان،
یاریل،
ییرتیل،
سو ایچ،
قورتول.
هانسی بارماغین اوزرینه قورتول هئجاسی(کلمه‌سی) دوشسه، او بارماق جرگه‌دن چیخار. بو ایش بوتون بارماقلارین آرادان چیخماسینا قدر داوام ائدیر. اوستا(باشچی، یا موللا) آخیرا قالمیش بارماق صاحیبی‌نین قولاغیندان توتوب دئییر:
راضی ها بالام راضی،
تیکیب دونونو درزی.
عابباسی وئریم خرجله،
تویون تزه‌دن باشلا.
قارغا قور،
قارغا ایسته‌ییرسن، قوش؟
اوشاق قارغا یا قوشدان بیری ایستر.
اوشاغین ایسته‌دیگی گؤیدن اوچانا قدر و یا گؤرونه‌نه قدر اوستا(باشچی، یا موللا) اوشاغین قولاغینی چکر و یئرده قالان اویونچولار ایسه اودوزموش اویونچونو تقلید ائدرلر. اوستا(باشچی، یا موللا) قوش و قارغا عوضینه ایسته‌نیلن باشقا وارلیقلارین آدینی قئید ائده بیلر.
بئلجه اویون یئنیدن باشلار داوام ائدر.
کؤچورن: عباس ائلچین