Yomrı ikmäk

(Rus xalıq äkiäte)

— Qarçıq, ikmäk peşerer ideñ? — digän.

— Närsädän peşerim soñ, on yuk bit.

— Ex, qarçıq, ärcä töbennän qırıp, bura poçmaqlarınnan seberep, beraz cıyılmasmı?

Äbi, keçkenä genä qanat belän ärcä töbennän, bura poçmaqlarınnan seberep, ber-ike uç on cıyğan.

Äbi şul onnan yomrı ikmäk peşergän dä täräzä töbenä swıtırğa quyğan.

İkmäk täräzä töbendä tora torğaç, kinät säke östenä tägäräp töşkän, säke östennän idängä, idän buyınça işekkä, annan, busağa aşa sikerep, öyaldına, öyaldıñnan tışqı basqıçqa, tışqı basqıçtan işeğaldına, işeğaldınnan uramğa çığıp, yul buylap tägäräp kitkän. İkmäk yul buylap tägäräp barğanda, qarşısına ber quyan kilep çıqqan:

— İkmäk, Yomrı ikmäk, min sine aşıym!—digän añar Quyan.

— Sin mine aşama, Qılıy quyan, min siña cır cırlarmın,— digän dä şunda uq cırlarğa totınğan.

— Min — Yomrı ikmäk, Yomrı ikmäk, mine ärcä töbennän qırdılar, bura töbennän seberdelär. Qaymaq belän tuğladılar, mayda bastılar, täräzä töbendä swıttılar. Min babaydan da qaçtım, min äbidän dä qaçtım, sinnän dä, Quyan, qıyın bulmas qaçwı! — digän dä, üz yulına tägäräp kitep barğan, quyan anı kürep kenä qalğan...

Yomrı ikmäk haman tägäräven belgän. Menä bervaqıt anıñ qarşısına ber büre kilep çıqqan.

— Yomrı ikmäk, Yomrı ikmäk, min sine aşıym!

— Sin mine aşama, Sorı büre, min siña cır cırlarmın.

— Min — Yomrı ikmäk, Yomrı ikmäk, mine ärcä töbennän qırdılar, bura töbennän seberdelär, qaymaq belän tuğladılar, may belän bastılar, täräzä töbendä swıttılar. Min babaydan da qaçtım, min äbidän dä qaçtım, min quyannan da qaçtım, sinnän dä qıyın bulmas qaçwı! — digän dä alğa tägärägän, büre anı kürep kenä qalğan.

Yomrı ikmäk tägärägän dä tägärägän. Menä bervaqıt anıñ qarşına ber ayu kilep çıqqan.

— Yomrı ikmäk, yomrı ikmäk, min sine aşıym!

— Qayda ul siña, Qıyşıq ayak, mine aşarğa! Min — Yomrı ikmäk, Yomrı ikmäk, mine ärcä töbennän qırdılar, buradan seberdelär, qaymaq belän tuğladılar, mayda bastılar, täräzä töbendä swıttılar. Min babaydan da qaçtım, min äbidän dä qaçtım, min quyannan da qaçtım, min büredän dä qaçtım, sinnän dä, ayu, qıyın bulmas qaçwı! — digän häm yomrı ikmäk tağın da alğa taba tägäräp kitkän, ayu anı kürep kenä qalğan.

Yomrı ikmäk tägärägän dä tägärägän, anıñ qarşısına ber tölke kilep çıqqan:

— İsänme, Yomrı ikmäk, sin nindi güzäl ikän?! Añar qarşı yomrı ikmäk cırlıy başlağan:

— Min — Yomrı ikmäk, Yomrı ikmäk, mine ärcä töbennän qırdılar, buradan seberdelär, qaymaq belän tuğladılar, mayda bastılar, täräzä töbendä swıttılar. Min babaydan da qaçtım, min äbidän dä qaçtım, min quyannan da qaçtım, min büredän dä qaçtım, min ayudan da qaçtım, sinnän dä, tölke, qıyın bulmas qaçwı!

— Nindi yaxşı cır! — digän Tölke.— Tik min, Yomrı ikmäk, qartaydım inde, bik naçar işetäm; minem borınım östenä utırıp tağın da ber genä cırlap kürsät äle. Qıçqırıbraq cırla.

Yomrı ikmäk tölkeneñ borın östenä menep utırğan da şul uq cırnı qabatlağan.

— Räxmät, Yomrı ikmäk, yaxşı cır. Min tağın da tıñlar idem. Minem telem östenä utırıp soñğı tapqır cırlaçı! — digän Tölke häm telen çığarğan.

Yomrı ikmäk uylap-nitep tormağan, tölkeneñ tel östenä sikergän, ä tölke anı şunda uq «ham!» itep yotıp ta cibärgän.