TÜRK BALASI

TÜRK DÜNYASI UŞAQ ƏDƏBİYYATI

ساققاللی اوشاق

+0 BƏYƏN

ساققاللی اوشاق

 جلیل محمدقولوزاده

     بو حئکایه‌نی ناغیل ائلمه‌میشدن قاباق بونو ایسته‌ییرم دئیم کی، بیر پارا اوشاقلاردا بئله بیر پیس خاصیت اولور کی، اللرینه کارانداش دوشن کیمی باشلاییرلار ائوین دیوارلارینی یازماغا. هله چوخوسو کؤمورنن ده، تباشیرنن ده یازیر. هله سن کؤمورو و تباشیری دئییرسن، من ائله پیس اوشاق گؤرموشم کی، الینه میسماری، یا بیچاغی آلیب دیوارلاری جیزیب خاراب ائله‌ییر.

   ندنسه، دیوار یازان اوشاقلارنان منیم آرام یوخدو؛ اوندان اؤترو کی، اگر سن یاخشی اوشاقسان و کؤنلون مشق ائله‌مک ایسته‌ییر، گؤتور کاغیذی، قلمی، بیر یئرده اوتور و نه قدر کئفیندیر، یاز.

ایندی کئچک ناغیلیمیزا:

   من ائله بیلیردیم کی، بیزیم اوشاقلار اؤزگه اوشاقلار کیمی او قدر ده دیوار یازان دئییللر؛ چونکی چوخ نصیحت ائله‌میشدیم و اونلار دا منه سؤز وئرمیشدیلر کی، دیوارلاری یازمایاجاقلار. آما آخیر واختلاردا گؤردوم کی، بالکونون دیواریندا، قاپی‌نین دالیندا بیر خلوت یئرده بیر بئله شکیل چکیلیب؛ دئیه‌سن، بیر حئیوان باشیدیر، قولاقلاری دا دئیه‌سن وار، بیر-ایکی آیاغی دا وار، آلتیندا بئش دفعه‌ الیف یازیلیب و بوندان ساوایی بئش-آلتی یومرو شئی چکیلیب. بونلارین هامیسی کارانداش ایله یازیلیب، ائله ناشی کوبود یازیلیب کی، بونو اوشاقدان ساوایی هئچ کس یازا بیلمز.

خوشوما گلمه‌دی، چاغیردیم اوشاقلاری:

- اده، گئنه دیوارلاری یازیرسینیز؟

اوچو گلدی دوردو یازی‌نین قاباغیندا.

- هانسینیز یازمیسینیز؟

اوچو ده داندی.

- ائله‌ده پس شئیطان یازیب؟

- دده، واللاه من یازمامیشام.

- دده، من ده یازمامیشام.

بالاجا قوربان دا "من یازمامیشام" دئیه-دئیه اللرینی اوزونه قویوب آغلاماغا باشلادی.

من دئیینه-دئیینه بیر اسکی تاپیب یازینتی تمیزله‌دیم و دئیینه-دئیینه چکیلدیم گئتدیم. آما بونو ائشیدیردیم کی، حئیدر تئیمورا دئییردی: - سن یازمیسان. - تئیمور دا حئیدره دئییردی: - سن اؤزون یازمیسان.

بورادا آغلایان اوغلوم قوربان قاچا-قاچا گلدی یانیما، گویا کی، بیر بؤیوک خبر گتیریب.

- دده، او یازینی حئیدر یازیب؛ واللاه، دده، حئیدر یازیب.

حئیدر ده آجیقلی-آجیقلی گلدی دوردو قوربانین قاباغیندا و اللرینی آتا-آتا ائله هیرسنن جاواب وئردی کی، آز قالیردی اللرینی سوخا اوشاغین گؤزونه.

من آجیقلاندیم و اوچو ده ساکیت اولوب ایسته‌دیلر گئده‌لر، من اونلاری ساخلادیم و بونو دئدیم:

من بیرجه بونو سوروشدوم کی، دیوارا یازدیغی‌نین معناسی ندیر؟

معناسی بو ایمیش: کبله عظیم ایسته‌ییرمیش بیر اینک چکه و اینگین آلتیندا یازدیغی بئش جیزیغین معناسی بو ایمیش کی، من اونا بئش مانات اینک یاغیندان بورجلو قالدیم. گیرده یازیلار یومورتادان قالان بورجومون حسابی ایمیش. من گئنه گولدوم و اوشاقلاریمی چاغیردیم و اونلارا بئله دئدیم:

- اوشاقلاریم، اوشاقلاریم، گلین، بورا گلین.

اوشاقلار دولوشدولار و گؤزلری دیوارا ساتاشان کیمی چوخ-چوخ تعجوب ائله‌دیلر و مندن سوروشماغا باشلادیلار:

- دده، بونو کیم یازیب؟

دئدیم:

- بالالاریم بو یازینی یازان دا سیزین کیمی اوشاق ایدی؛ آنجاق بیرجه تفاووتونوز اورادادیر کی، اونون ساققالی وار، سیزین هله ساققالینیز یوخدور.

اوشاقلار گولوشدولر و معلوم کی، بونلارین گولوشوب شاد اولماقلارینا بؤیوک بیر سبب وار ایدی کی، هر بیر اوخوجویا آشیکار اولسون گره‌ک.

کؤچورن: عباس ائلچین


BÖLÜM : Hekayə,