TÜRK BALASI

TÜRK DÜNYASI UŞAQ ƏDƏBİYYATI

قارا چوخا

+0 BƏYƏN

 قارا چوخا

یازان : عباس ائلچین

           گونلرین بیر گونونده ، قاراکیشی آدلی بیریسی، اؤزونو یاشادیغی قارا گوندن  قورتارماق اوچون قاراچوخاسی   نین  دالیسیجا  یولا  دوشدو.  هایانا  گئده جه گینی  بیلمیردی آنجاق باش توتوب گئتدی.

آز چوخ گئتدیکدن سونرا یول هاچالاندی، یولون آیریجیندا بیر قوجا قورد دایانمیشدی. کیشی قورخاراق:'' قورد اوزو اوغورلو اولار"  دئیه دوشوندو.

- « هاردان گلیب هارا گئدیرسن آی کیشی؟!» قوجا قورد سوروشدو.       

      کیشی قورخو ایله گونلری نین قاراگئچدیگیندن قاراچوخاسی نین دالیسیجا یولا دوشدوگونو، قوردا آنلاتدی. قورد بیرآز دوشوندوکدن سونرا:

-«ائله ایسه ، قاراچوخانی بولسان منیم ده بیر دردیم وار، درمانینی اوندان سورا بیلرسنمی؟» دئدی.

-« ندن اولماسین قورد قارداش ! سؤیله سنه! دردین ندیر؟..» قاراکیشی دئدی.

قورد ایچین چکه رک: « ایللر دیر باشیم آغراییر، بیلمیرم نئیله ملی یم» دئدی.

       قاراکیشی قوردون دردی نین درمانینی بولاجاغینا سؤز وئردی. قوجاقورد:« یولون آچیق اولسون» دئیه یولون ساغ قولونو  قارا کیشییه گؤستردی. قاراکیشی گئتدی...گئتدی ، یئتیشدی بیر کندین قیراغینا. بیر کندلی تارلاسی نین آویریندا گون اورتالیغا چیخمیشدی.کندلی کیشینی گؤرجک سسلندی:-« بویور گؤره ک قوناق ! هاردان گلیب هارا گئدیرسن؟...»

       کیشی کندلی نین مندیلی نین باشیندا اگلشیب بیر ایکی تیکه ووراندان سونرا اولانلاری کندلییه آنلاتدی. کندلی بیر آز دوشوندوکدن سونرا بارماغی ایله تارلاسی نین کؤده لشمیش بیر بوجاغینی کیشییه گؤستره رک دئدی:

-« اورانی گؤرورسنمی، ایللردیر اوردا هر نه اکیره م بار وئرمیر. بیلمیرم نییه. قاراچوخانی بولسان ندنینی اوندان سوروشا بیلرسنمی؟»

-« باش اوسته!» کیشی آیاغا قالخاراق دئدی.« قاراچوخانی بولسام کسین بیل یانینا الی بوش قاییتمایاجاغام».

       قارا  کیشی یولجولوغون آردیندا بیر شهره واردی. شهر قارا گئینمیشدی. دوداقلاردا گولوش سولوب هامی دارغین – دالغین  گؤرونوردو.کیشی شاشاراق بو دورومون ندنینی  سوروشدو.

-« بیر ایلدن چوخدورسئویملی پاشامیزین بیریجیک قیزی خسته له نیب آیاغا قالخانمیر». شهرلی لر اوزونتو ایله آچیقلادیلار. کیشی بیر سؤز سؤیله مدن یولا دوزلدی.

        قارا کیشی آز گئتدی،  چوخ گئتدی ، دره تپه دوز گئتدی،  آغاجلارین کؤلگه سینده  دینجلدی. چوبانلارین دوغراماجیندان یئدی. بولاقلارین سرین سویوندان ایچدی.داشلاری یاسدیق، بولوتلاری یورغان ائله دی. سونوندا، "آختاران تاپار" دئییلدیگی کیمی قاراچوخانی بولدو. قاراچوخا بیر قوبونون ایچینده دوشوب یاتمیشدی.قارا کیشی قاراچوخانی ییرقالاییب یوخودان اویاندی.

-« اولان  نه باشینی آتیب یاتمیسان دور گؤر باشیمیزا نه لر گلیب؟» دئیه کیشی دونقولداندی.

-« اده  سن می سن  قارا کیشی؟!»  قارچوخا کیشینی سوزه رک گولومسه ندی.

-« دوغروسو، بیلمیرم هاچان بوردان گئچیردیمده آیاغیم بودره دی     بو قوبویا دوشدوم. چیخانمادیغیمی گؤرونجه باشیم آتیب یاتدیم. یاخشی گلدین. هایدی توت الیمدن بورادان چیخاییم!» قارا چوخا یئنه گوله رک ائکله دی.کیشی چکیب قاراچوخانی  قوبودان چیخارتدی.قاراکیشی قاراچوخانین چارچامورلو  قیلیغین گؤرونجه ایلک کز اولاراق اوزو گولدو. اؤپوش گؤروشدن  سونرا، قاراکیشی اولانلاری قاراچوخایا  دانیشدی.قاراچوخا قاراکیشینی بیربیر دینله دیکدن سونرا دئدی:

-« قارا کیشی! منی اویاتدیغین دوغرو؛ آنجاق  بونو دا بیلمه لی سن: سئل بیر یول کؤتوک گتیره ر.یولدا گؤردوکلرینه گلینجه ؛   پاشانین قیزی  نین  دردی  نین درمانی،  سود گؤلونده چیممکدیر، کندلی نین تارلاسی    نین کؤده لشدیگی، آلتینداکی گؤمولو  اوزوندندیر؛   قوجا قوردون   باشی نین آغریسی نین درمانی  ایسه  بیر  آخماق  آدامی یئمکدیر.  قارا کیشی !  آرتیق آیریلیق سوره سی گلدی.گئد،    یاخشی یولجولوقلار!...»

           قارا کیشی قاراچوخا ایله قوجاقلاشیب آیریلدیقدان سونراگلدیگی یولدان قاییتدی.قارا کیشی ، نئچه گوندن سونرا قارا شهره چاتدی. دوس دوغرو پاشانین یانینا واریب  قیزی نین دردی نین درمانینی اونا سؤیلـه دی. درمانی یئرینه گتیرینجه  قیز ساغالیب آیاغا قالخدی. قارا شهر ، قارالاری سویونوب  آل گئییندی. پاشانین چیچکلری چاتلاییردی. او قاراکیشینی  باغرینا باساراق دئدی:

-« تانری سنی قوروسون!  نه دیلگین وارسا دئ  من یئرینه یئتیریم!...»

-« پاشام ساغ اولسون ! من یالنیز سیزین ساغلیغینی ایسته ییرم. ایذین وئرسه نیز قوللوغونوزدان آیریلیم.» دئیه قاراکیشی باغیر باسدی.

-« باخ اوغلوم! گؤرونور سن یاخشی آداما اوخشاییرسان. ایسته سن بوردا قال ،سئورسن قیزیملا ائولن، دیلرسن مندن سونرا بو شهرین پاشاسی اول...»  دئیه پاشا یالواردی.

قارا کیشی اوزونو پاشایا توتوب دئدی :

-« دوغروسونو ایسته سن پاشام ، منیم  قاراچوخام یئنیجه اویانیب اونا گؤره من بورالاردا قالانمارام. من اؤز آلین یازیمین  دالیسیجا گئتمه لی  یم. »

            پاشا  قارا کیشینی گئتمکدن جایدیرمایاجاغینی گؤرونجه بویوردو اونون یول آزیقاسی اوچون پولدان پارادان گتیردیلر. بونو گؤرن قارا کیشی :   « قاراچوخاسی اویان آدام  یوکونو بئله شئیلرله آغیر ائله مه ملی دیر پاشام»  دئیه  چگینلرینی سیلکه له  دی.  علاجی کسیلمیش پاشا :  « یولون آغ اولسون» دئییب قارا کیشینی یولا سالدی.

                قارا کیشی اوخویا-  اوخویا  ،گوله - گوله گلیب کندلییه  چاتدی.کندلی قارا کیشییه :« گل اگلش بیر  تیکه چؤره     ک یئه. گؤروم نئیله می سن ، منیم تاپشیریغیمی یئرینه یئتیره بیلدین می؟» دئدی.

قاراکیشی : « تله سیرم .گئتمه لی یم . ائله بورایادا  سندن اؤترو گلدیم. تارلانی  نین کؤده لشمیش یئرینده  بیر گؤمولو گیزله نیب. اونو چیخاردیرسان. یئرین بار وئره جکدیر.» دئدی.

شاشقین  کندلی  بالتانی  اوچ دؤرد  یول یئره  ووردوقدان سونرا  گؤمولونون   اوستو آچیلیب  قیزیللار گؤروندو.

-« باخ قارداش! بو قیزیللار ایکیمیزینکی دیر گل بیرلیکده چیخارداق...» کندلی قاراکیشی نین اتگیندن یاپیشاراق یالواردی.

قارا کیشی دارتیناراق اتگینی کندلی نین الیندن چیخاریب قیشقیردی:

-« اولان گئچ اویانا گؤروم . منیم قاراچوخام یئنجه اویانیب . من بوردا گلیب سنینله تورپاق – تورپاق اویاناییب قیزیل چیخاردا بیلنمه رم .»

 کندلی نین آغزینی آچیلا قویان قارا کیشی، یولونو توتوب گئتدی... قارا کیشی سون تاپشیریغی یئرینه یئتیرندن سونرا نه یاپاچاغینی دوشونورکن یولون قووشاغیندا قوجا قوردا یئتیشدی. قورد کیشینی گؤرجک دیکله نیب :« سؤیله گؤروم قاراچوخانی بولدون مو؟» دئیه سوروشدو. قاراکیشی گؤله رک:

«هه! موشتولوغومو وئر سنین دردین درمانینیدا تاپمیشام»دئیه بوتون اولوب بیتنلری باشلانغیجدان سونونادک قوردا دانیشدی. قوجا قورد  اوزون بیر سوره دوشونجه  یه دالدی. سونرا بیردن بیره یئریندن سیچرایاراق  قاراکیشی نین اوستونه آتلانیب کؤکسونون اوستونده اوتوردو.قارا کیشی دیلی توتولاراق:

«قورد قارداش یاخشیلیغا یامانلیق اولماز!...» دئدی. قوجا قورد قیزغین- قیزغین :« اولان مایماق اوغلو مایماق من سندن آخماقینی هاردان تاپاجاغام. سن واری دؤولتی سئوگینی... بیراخیب دا  نه یین  دالیسیجا گزیرسن؟!... » دئیه قارا کیشینی آل قانینا بله دی.

       آی ایشیغی هر یانی آیدینلاتمیشدی. باش آغریسیندان قورتولان قوجا قورد، سیلدیرم قایانین باشیندا  اوزون اوزادی نئچه کره  اولادی. اولامانین سسی  یوخونو  بیر چوخونون گؤزلریندن قاچیرتدی...

 سون/ بایرام آیی۱۳۸۷


BÖLÜM : Nağıl,