TÜRK BALASI

TÜRK DÜNYASI UŞAQ ƏDƏBİYYATI

یوخو

+0 BƏYƏN

یوخو

یازان : عباس ائلچین

".... سن هارالاردا ایدین ؟ سنی گؤیده آختاریردیم یئرده تاپدیم " دئییب  بیلگینی سیخدی. کیشی قیشقیریب یوخودان داشلاندی. گونش آچیشقادان ایچری بویلانمیشدی.  قان تر ایچینده ایدی. آیاغا قالخدی. اورگی کؤکسونو سؤکوب چیخاجاقدی سانکی. یئنه بو قورخونج یوخو ایله آییلیردی. " بو بیر اویاری می ؟ بو تئزلیکده اؤله جگم می؟ " دئییندی کیشی- " یوخ! یوخ ! اؤلمک ایسته میرم، هله چوخ گنجم. اؤلومون الیندن بیر یئرلره قاچمالی یام . نئجه اولورسا اولسون اؤلومسوزلوگو تاپمالی یام....".

کیشی بوخچاسینی باغلادی. آز گئدیب اوز گئدیب دره تپه دوز گئده جکدی. ال ترپتملی ایدی. تلسیک یولا قویولدو. هارا گئده جگینی بیلمیردی آنجاق باش آلدی گئتدی. بیچینچیلرین آیرانیدان ایچدی ؛ چوبانلارین دوغراماجیندان یئدی ، آغاجلارین کؤلگه سسینده یاتدی.

گونلرین بیر گونونده ، بیر اورمانا یئتیشدی. اورمانچی آغاج قیرماقدایدی. کیشینی گؤردوکده ایشدن ال چیکیب آلنینین ترینی الینین دالی ایله سیله رک سؤروشدو :

_" اشی ! هارادان گلیب هارا گئدیرسن ؟ "

کیشی اولوب بیتنلری دانیشدیقدا، اورمانچی بارماغی ایله اوجسوز-بوجاقسیز اورمانی  گؤستره رک سوروشدو:

-"سنجه، نئچه ایلده بو اورمانین بوتون آغاجلارینی قیرا بیله رم؟"  

کیشی گولومسه یه رک :

-" بئله کی سن قیریرسان... اوچ-دؤرد یوز ایل چکر "- دئدی.

-" بئله ایسه ، بو اورمانین سون آغاجی قیریلانادک منیمله بورا دا یاشایا بیلرسن " – دئدی اورمانچی.

کیشی :

-" اوچ – دؤرد یوز ایل  اوزون بیر عؤموردور آنجاق اؤلومسوزلوک دئییل.. یوخ! ، یوخ! من بورادا قالا بیلمه رم .." دئیه یولا دوغرولدو.

کیشی یوللاری کسه – کسه گلدی بیر داش کسنه یئتیشدی. داش کسن قوجامان بیر قایانی چاپماقدایدی. اولوب بیتنلر دانیشیلدیقدان سونرا داش کسن کیشییه اوزونو توتوب دئدی:

-" گؤردویون بو داغلاری چاپیب قورتارانادک منیم له قالسان  اوچ – دؤرد مین ایل یاشا بیلرسن  . نه دئییرسن قالیرسانمی ؟"

-" اوچ- دؤرد مین ایل اوزون بیر عؤموردور آنجاق اؤلومسوزلوک دئییل . یوخ! یوخ! من بوردا دا قالا بیلمه رم " – دئییب یئنه یولا دوزلدی کیشی.

-" یاش کسن ، داش کسن ، باش کسن ، آز یاشایار . اؤلومسوزلوکله بونلارین بیر ایلیشکیسی اولا بیلمز.."- دئیه دوشونن کیشی ایکی یولون آیریجیندا بیر قوردلا قارشیلاشدی.بئنیندن " قورد اوزو اوغورلو اولار"     کئچه رک قوردان  اؤلومسوزلوگون سالیغینی توتدو.

-" بیزیمله قالسان سونسوزادک یاشایا بیله جکسن "- دئدی قورد.

کیشی  شاشغینلیق لا  قوردون سؤزونو یئنه له دی :

-" بیزیمله ..!؟"

قورد ساغ یولون سونوندا دومانلارین ایچینده گیزلنن داغین یاماجینداکی ائوجیگی  گؤستره رک :

- ” من له قاری "- دئدی –" او، یولونو گؤزله ییر ، تلس !"

 ***

کیشی ایللر ایدی  قورد قاری ایله یاشاییردی آرتیق آی -گونون سایی الیندن چیخمیشدی . گونلرین بیر گونونده کیشی اوزونو قارییا توتوب دئدی:

- ´ قاری ننه ، چوخداندیر سیزله بوردا یاشاییرام آنجاق دوغروسونو ایسته سنیز اورگیم یوردومادان یانا بیر آز داریخیر. ایسته ییرم گئدیب یورد – یوواما بیر باش چکم " .

قاری گولدو –" اوغلوم ، سن هئچ بیلیرسن می نئچه ایلدیر بورادا یاشاییرسان؟ سن بئله دوشورسن ایندی سنین یورد – یوواندان بیر ایز – توزمو قالیب؟ "

کیشی ایستگی نین اوزه رینده آیاق دیره یینجه ، قاری بیر آت گتیریب جیلووونو اونون الینه وئره رک دئدی:

-" اوغلوم ! گئت یوردونو دولاندا تئز گل . ساقین آتدان آشاغی یئنمه یه سن. قورخولودور ؛ هر آن اؤلومه توتولا بیلرسن."

کیشی آتی مینیب یوردونا ساری اوز قویدو . قاییتدیغی یئرلر سانکی گلدی یئرلر دئییلدی. گؤردوگو داش کسندن ، داغدان بیر ایز- توز قالمامیشدی. اورمانچی ایله بولوشدوغو اورمانین یئرینده ایندی بؤیوک بیر کند سالینمیشدی.  یورد – یوواسیندا  تانیمادیق باشقا بیری لری یاشاییردیلار.هوش باشیندان چیخماقدایدی. آتینین باشینی  چئویردی قاری ننه نین ائوینه ساری. دالغین – دالغین قاییدیردی.

-" دلیقانلی بو آرابایا بیر ال آتارسان می ؟ "

کیشی اؤزونه گلدی. قوجا بیر کیشی ایدی چاغیران. قوجانین ائششک آراباسی چامورا باتمیش نه قدر گوجنیردیسه ترپتنمیردی یئریندن. آربا دولو ایدی دمیر باشماقلار ایله.کیشی آتدان ائنیب قوجا ایله چیگین-چیگینه آرابانی ایته له دی. کیشی، " بو  دمیر باشماقلار نه دیر قوجا ، یاشیمدان بئله بیر شئی گؤرمه میشدیم! "دئیه سوروشدو . قوجا، کیشی نین قولوندان توتاراق:

-" بونلار سنی آختارارکن ییرتدیغیم دمیر باشماقلاردیر کیشی ، سن هارالاردا ایدین ؟ سنی گؤیده آختاریردیم یئرده تاپدیم " دئییب بیلگینی سیخدی. کیشی قیشقیریب یوخودان داشلاندی. گونش آچیشقادان ایچری بویلانمیشدی...

۱/۸/۱۳۹۰

حیکایه، آذربایجان ائل یارادیجیلیغیندان آلینمیشیدیر.


BÖLÜM : Nağıl, Hekayə,