+0 BƏYƏN
کئچلین فندی
بیری وار ایدی بیری یوخ ایدی، " ولی " آدلی بیر کئچل وار ایدی. بونون وار یوخ بیرجه داناسی وار ایدی. بیر گون کووخا قونشولاری ییغیب دئدی:
گلین گئدک ، کئچلین داناسینی بیر فند ائله‌ییب کسدیرک، چوخداندیر دیلیمیزه ات دَیمه‌یب.
سؤزو بیر یئره قویوب گلدیلر کئچلین یانینا دئدیلر:
ولی! گل بیر شئی ائله‌یک . چوخدان بری دیلیمیزه ات دیمه‌یبدیر . گل بوگون سنین دانانی کسک یئیک صاباحدا بیزیمکینی کسه‌ریک.
ولی راضیلاشیب دانانی کسیب پایلادی.
ولی بیر هفته گؤزله دی ، هئچ کس اوز داناسین کسمه دی ایکی هفته، اوچ هفته، بیر آی کئچدی کسن اولمادی. ولی باشا دوشدو کی بونو آلدادیبلار.
اؤز-اؤزونه دئدی :
یاخشی ، گؤرون سیزین باشیزا نه اویون گتیره جگم.
کئچل دانانین گؤنو گونون آلتینا قویوب قوروتموشدو. گؤنو خیردا - خیردا دوغراییب خورجونا دولدوروب ، ائششگین بئلینه آشیردی . شهره طرف یوللاندی. ولی گلیب بیر بولاغین باشیندا یاتدی. گئجه سووداگرین کاروانی گلیب بو بولاغین اوستونده دوشدو . ولی سوودا گره دئدی :
سیز مندن بیر آز آرالی اوتورون. چون کی منیم قیمتلی شئی لریم سنینکینه قاریشار.
سووداگر فیکیرلشدی کی دلی دن دوغرو خبر. گئجه سووداگر کئچلین خورجونو گؤتوروب ، اوزونون تایلارینی قویدو ، اوزوده باشلادی یول گئتمه یه.
آما کئچل یاتمامیشدی گؤزونون اوجو ایله باخدی، سحر آچیلدی. کئچل گؤرودو کی اونلار گئدیب تئز تایلاری ائششگه یوکله‌ییب ائوه قاییتدی. ائوده آچیب گؤردو کی قیمتلی پارچالاردیر.
کئچل آروادینا دئدی: آرواد گئت آرشین گتیر پارچالاری اؤلچک.
آرواد گئدیب کووخادان آرشین ایسته دی.
کووخا دئدی: آرشینی نئیله‌یه جکسن؟
آرواد دئدی: کئچل بیر یوک پارچا گتیریب ، اؤلچه جک.
کووخا آرشینی وئردی ، اوزوده گلدی گؤردو دوغوردان دا کئچل بیر یوک پارچا گتیریب.
کووخا دئدی: آی کچل بو هاردان دوشوب الینه؟
کئچل دئدی: سیز ائله بیلدینیز دانانی کسدیردینیز منه ضرر ائیله دی. دانانین گؤنونو قورودوب تاغلاق ائله دیم. سونرا تاغالاقی دوغراییب آپاردیم شهر ده بیر قیزیل پولا ساتدیم ، بو پارچالاری آلیب گتیردیم.
کووخا بو احوالاتی قونشولارینا سؤیله‌دی ، قونشولاری هامیسی دانالارینی کسدیلر ، دریسینی قورودوب تاغلاق قاییردیلار . آپاردیلار شهره ساتماغا باشلادیلار اوردا قیشقیرماغا:
-بیر قیزیلا تاغلاق..بیر قیزیلا تاغلاق..
بازار آداملاری دوشدولر بونلارین دالینا. باشلادیلار ال چالیب اویناماغا کی تاغالاغین بیر قیزیل پولا اولار؟ گؤردولر کئچل بونلاری آلدادیب قاییدیب گلدیلر کی کئچلی اؤلدورسونلر . کئچل دامدان باخیردی. کووخا گیل کئچلی گؤردولر، کئچل قاچدی چؤلده قونشوسو چوبانین یانینا گئتدی. چوبان دئدی: کئچل هارا قاچیرسان؟ کئچل دئدی : پادشاهین قیزینی گولجه منه وئریلر . من آلمیرام اونا گؤره فاچیرام.
ایسته ییرسن گل پالتارلاریمیزی دییشک قیزی سنه وئرسینلر.
چوبان و کئچل پالتارلارینی بیربیری ایله دییشدیلر. کووخا گلیب چوبانی کئچل بیلیب چایا ایته له دی.
گل سنه کیمدن دئییم، کئچلدن. کووخا ائوه گلندن سونرا کئچل چوبانین قویونلاری ائوه گتیردی. کووخا قویونلاری گؤروب دئدی: من سنی چایا آتدیم قویونلاری هاردان گتیردین؟ کئچل دئدی: اگر چایا دوشوب دئسن " دریججو " اوندا قویونلار گله‌جک ، من بو قویونلاری چایدان گتیرمیشم.
کووخا دئدی: من چایا دوشوب دئسم " دریججو " اوندا قویونلار گلرمی؟
کئچل دئدی: هه!
کووخا سحر دوروب گئتدی همین یئرده ، اورادا اوزونو چایا آتدی کی دریججو دئسین سودا ، بوغولوب اؤلدو .