TÜRK BALASI

TÜRK DÜNYASI UŞAQ ƏDƏBİYYATI

سیراق

+0 BƏYƏN

 سیراق*

 یازار:م-ع-ب-(گرگرلی آراز)


ایسته دی کی دارا شاه*،

ساقلارا حمله ائدسین.

اونلاری یئر اوزوندن،

مالین  جانلارین دیدسین.

 

ساقلاردا*بیرله شنده،

ساکس فور*اود شمشیریله.

سیماری *اوخ آتانلار،

اوآمیریس*لشکریله.

 

گلدیلر ییغیشدیلار،

بیرلیگی یاراتسینلار.

قارانلیقی گوی لردن،

اوزاق یئره آتسینلار.

 

سیراق آدلی مهترده،

یاخینلاشیب سویله دی:

دارا اوردون قیرماقا 

منیم نقشه م بئیله دی.

 

آمما ایه ر من گئدسه م،

ائولادلاریم آلاجاق.

اوغول، نوه، نتیجه م،

یاشایشدا قالاجاق.

 

حوکمودار قبول ائتدی،

آلدی سیراق پیجاقی.

قولاقلارین کسدی او ،

بورونداکی اوجاقی.

 

سونرا اودولا باسدی

جسمینه او یارالار.

آغ سینه ده بیلگده،

سوموگه جن آرالار.

 

سیراقدا دوشدی یولا،

گئتدی دارا  یانینا.

ساقلاردان شیکایتین،

آلا قانین قانینا.

 

چوخ آغلادی سیزلادی،

دارا سوزه ایناندی.

چوخ آغلایب سیزلاسان،

اوره ک حتمی سیناندی.

 

سیراق دئدی: ائشیددیم،

من آتلارا  باخاندا.

اوزه گلن بو آخشام،

ساقلار  اوردان  چیخاندا.

 

دوشرگه دن*چیخاجاق،

سیزه ساری گلسینلر.

تارلالاری*یاندیریب،

اوره کلری دلسینلر.

 

ایه ر سیزین اوردونوز،

کسه یولو گئدسه آز.

منده کی بلدجیزه م،

قیشیمیز اولاجاق یاز.

 

قاباقدان  بوغازلاری*،

توتاق بیرجه، بیرجه ده.

باغلی تیلوولا *توتاق،

قاچانماسین سئرچه ده.

 

سیراقین بدبخت لیگی،

غمگین ائتدی دارانی.

سوزلرینه ایناندی،

حربه دوردو آرانی.

 

اوندا سیراق ال گویه،

چاغیردی اولمه ز اودو.

اینتیقام او آلماقا،

توکون موقدس سویو.

 

اوجا سسله او، دئدی:

قراره گلدیم بویون.

دارا شاهین الیله،

آچیلاجاق بو دویون.

 

بویوک اوردو قورولدی،

مین باشی راسپوتانی*.

تعیین اولوندو باشجی،

اویاتدیلار یاتانی.

 

یئددی گون یئمکیله،

ووردو سوسوز صحرایا.

اوندا بولوندو بعلی،

اونلار  گلیب هارایا.

 

سیراقدان سوروشدولار:

بوردا نه بیر بولاق وار؟

نه وحشی  حیوان قوشلار،

نه بیر سیراق ، نه ساقلار؟

 

نه کی بیرده ایره لی،

نه ده گئری گئتمه گه ؟

نه سنی وادار ائتدی،

بو ایشی سن ائتمه گه؟

 

سیراق الینی آچدی،

برکیدن گولوب، دئدی:

من غلبه قازاندیم،

اوردونوز اولوب گئتدی.

 

ساقلاری من قوتاردیم،

ائلیمه قوتار دئدیم.

سوزوزلوقا دوشدونوز،

آجلیقا محکوم ائتدیم.

 

درحال وورولدی باشی،

جسمیدن آیری سالدی.

او هله ده یاشایر،

 یارادان *طرف آلدی.

 

ایندی ده هی دئییلیر:

سیراق، سیراق ، آی  سیراق.

اوخویور باخ سنیله،

چشمه  چایلار  مین بولاق.

 

سیراق-هم بیر شخص همده بیر بویوک امپراطور دوولت ،میللت آدی اولوب.

داراشاه-فارس پادشاهی

ساق-قبیله، تورک طایفا آدی.

ساکس فور،سیماری،اوآمیریس—ساق حوکمودارلاری

دوشرگه-اوردوگاه،قرارگاه

تارلا –مزرعه،اکیلن یئر

تیلوو-بیر نوع تله

راپوسبات-فارس اوردوسونون باشجی سی

یارادان--ایلاهه

 


BÖLÜM : Şeir,