+0 BƏYƏN
بالاجا آیی‌نین ناغیلی
سئویل ائلچین
بیر گون وار ایدی، بیر گون یوخ ایدی. بیر بالاجا آیی وار ایدی. بیر گون بالاجا آیی اویناماقدان یورولوب ائوه گلدی. آناسی ائوده دئییلدی. برک آج ایدی. اویان بویانی آختاردی. یئمک اوچون بیر شئی تاپا بیلمه‌دی. ائودن ائشیگه چیخدی. بیرآز مئشه‌ده دولاندی. بیردن گؤزو آغاج باشیندا بیر آری پتگینه دوشدو. سئویندی. آغاجا دیرماشیب پتگی یئندیردی. دویونجا بالدان یئدی. سونرا آتلانا-آتلانا ائوه قاییتدی. آناسی ناهار پیشیریردی. بالاجا آیی اوتاغینا گئتدی. بیرآزدان قارنی آغریماغا باشلادی. آغلاماغی‌نین سسینه آناسی اوتاغینا گلدی. آناسی سوروشدو:
- سنه نه اولوب، نییه آغلاییرسان؟!
بالاجا آیی دئدی:
- قارنیم آغریییر!
آناسی دئدی:
- نه یئمیسن؟
بالاجا آیی دئدی:
- آجمیشدیم، مئشه‌ده بال یئدیم!
آناسی دئدی:
- بال کی قارین آغریتماز؛ چوخدا فایدالی بیر یئمک‌دیر.
سونرا بیرآز فیکرله‌شیب دئدی:
- قوی دوکتورو چاغیریم گلسین.
آناسی دوکتورا تئلئفون ووردو. دوکتور گلیب بالاجا آیینی معاینه ائله‌یندن سونرا دئدی:
- بالاجا آیی! سن بو کیفیر اللرین له بال یئدین؟!
بالاجا آیی باشینی آشاغی سالدی. دوکتور دئدی:
- سن بیلمیردین غذادان قاباق گره‌ک اللرین یویاسان؛ یوماسان میکروبلار قارنینا گئدیب سنی ناخوشلادار؟
بالاجا آیی اوتاندی. دوکتور اوچ-دؤرد دنه دوا وئردی. دوکتور گئدندن سونرا، بالاجا آیی‌نین آناسی دئدی:
- گل دوالارینی یئ قارین توختاسین.
بالاجا آیی دئدی:
- قوی گئدیم اللریمی یویوم!
1397.11.03