+0 BƏYƏN
قره قورودو باش دگیل بئله‌سینن دانیشمایینگ
بیرپارا وخت‌لر بیری دئییر کی فیلانی کیمسه‌نینگ قره قورودو باش دگیل بئله‌سینن دانیشمایینگ.
مونونگ حیکایتی بودور کی:
گچن زامان‌لار آروادلار خوروس اوخوماق وختی اوخودان (یوخودان) اویانیرلاریدی. یاییق یاییرلاریدی و آیرانینی بیر بؤیوک قازانـدا قئینه دیرلاریدی و چیکه‌لیگ* قاییریرلاریدی.
اوندا چیکه‌لیگی تؤکورلاریدی (تؤکورلریدی) بیر آغ بؤیوک کئسسه (توربا) ایچینه و چاتمادان آسیللاریدی.
و بیر بؤیوک قازان قویولاریدی او کئسسه‌نینگ آلتینا تا چیکه‌لیگ سویوندان دولا.
وختی قازان چیکه‌لیگ سویوندان دولاردی ، اونو قئینه‌دیرلاریدی (قاینادیرلاریدی) تا قره قورود اولا.
ایندی بوردا بیر پارا آروادینگ قره قورودو باش اولمیردی (برکیمیردی) و درفـده* یوخودو کی تؤکه ایچینه و اوبادا گئجه‌لی کؤچوردو.
بو آرواد بیر ایر* بو قره قورودا دئییردی تا باش اولا:
قره قورودوم باش
قره قورودوم باش
اوبا کؤچدو یورددا قالدینگ
قار تؤکولدو آلتـدا قالدینگ
قره قورودوم باش
قره قورودوم باش
و إله ایداما وئریردی؛
اگر اوبا-اوکا أل ائده‌نن چز(جن) قره قورود باش یا سیفت اولمایایدی مجبوررودو کی قازانی یان إده یئره و تئز اونو یوآ (یویـا) و قویـا قازان تورباسی ایچینه و آمادا اولا کؤچمگ ایچی.
بو آرواد چون قره قورودو سیفت یا باش اولماموشدو چوخ ناراحاتیدی و یاخشی سؤزدن ده یامانی گلیردی.
و خلخ چون بیلیردی کی بو آروادینگ قره قورودو باش اولماموش، اوندان هادار إدیرلاریدی و دئییرلریدی مونونگ قره قورودو باش دگیل بئله‌سینن دانیشمایینگ.
و بو إل ایچینه بیر یاخشی مثل اولموشدور.
گؤندرن : امراله پناهی آزاد (نامی)
*چیکه‌لیگ: پنیره بنزر بیر چئشیت آغارانتی
*درف: ظرف، قاب
*ایر: ییر، قوشقو، شئییر
-بو دئییم گونئی تورکجه‌سی‌نین دئگیش‌لرینـدن اولان قاشقایی إلی‌نین کشکول‌لو طایفاسی آغیزی ایلا یازیلیبدیر.
نفیس سینافر
قایناق:
http://elbilimi.yeniqapi.com/