+0 BƏYƏN
خودای‌بردی غورقاق بیلن تیلکی
بیر بار اکن، بیر یوق اکن، خودای‌بردی دیین بیر آدام بار اکن. اول اؤرأن غورقاق اکن. مؤجکدیر شاغال-آ بیله-ده دورسون، تیلکیدن داغام غورقار اکن. اونونگ ایکی سانی عایالی بار اکن. بیر گوندن بیر گون مونونگ عایاللاری‌نینگ هر هایسی بیر آلاچا دوقاپدیر. خودای‌بردی بو آلاچالاری ساتماق اوچین یابیسینی مونوپ، بازارا اوغراندا، عایاللاری حالوا هم سویجی سارغاپدیرلار. اول یابیسینی لونگقولدادیپ باریارکا، اؤنگوندن بیر تیلکی چیقیپ:
- خودای‌بردی، نیرأ گیتجک، هوْو! - دیییأر.
خودای‌بردی غورقاق تیلکیدن چکینجیرأپ، دوغروسوندان گلیپدیر:
- آی، عایاللاریم بیر-ایکی آنی آلاچا دوقاپدیرلار-دا، شونی "ساتیپ گل" دیییپ ایبردیلر - دیییأر.
اوندا تیلکی:
- بازاردا ساتجاق بولوپ یؤرمه-ده، مانگا ساتای، هألی بازاردان غایدانگدا، پولونگی اؤنگوندن ییقارار-دا برأیرین - دیییأر.
خودای‌بردی غورقاق بولسا:
- بولجاق اوندا، یؤنه سن منی کؤپ غاراشدیرایماغین، بازاردان گلیأنچأم، اؤنگومدن چیقاریپ، تایین ادیپ دورگین! - دیییأر.
تیلکی:
- آی، سن آرقایین بولای، اؤنگونگدن پولونگی تاییار ادیپ غویارین - دیییأر.
خودای‌بردی غورقاق مونونگ سؤزونه اینانیپ، بازارا گیدیپ، باریپ بازاردا گزن بولوپ یؤرموش. بازاری پولسیز بازارلاپ، اول عایاللاری‌نینگ سارغان زاتلارینی هم آلیپ بیلمه‌یأر. اونسونگ یابیجیغینی مونوپ، ینه ایزینا غایدیار. یولدا تیلکیدن پول آلجاق آدام، یابیسی‌نینگ اوستونده تلپه‌گینی غیشیجاق آتان بولوپ، هینگله‌نیپ گلیأرمیش. هألکی آلاچاینی ساتان یرینه گلسه، تیلکی نیرده، زات نیرده، پول نیرده - غوم-غوقلوق. خودای‌بردی غورقاق آنغالیپ، دوروپ-دوروپ، کأن غاراشیپ، آخیری عالاچسیز بولوپ اؤیونه غایدیار. گلیپ، بوش خورجونینی غولتوقلاپ اؤیونه گیریأر.
عایاللارینی هر هایسی بیر یردن:
- سویجی أکِلدینگمی؟ حالوا أکِلدینگمی؟ - دییشیپ، مونونگ خورجونینی آلیپ گؤرسه‌لر، اینه اؤنگکوسی یالی بورا-بوش خورجون.
اولار:
- إری، نأمه، سارغان زادیمیزی آلمانسینگ. یا آلاچانی ساتیپ بیلمه‌دینگمی؟ - دیییپ سورایارلار.
خودای‌بردی غورقاق:
- آی، هِلِیجانلار، بیلر بولسانگیز، بازارا باریارکام، اؤنگومدن بیر تیلکی چیقدی. اول: "غایدیشین گلیأرکأنگ، پولونگی یولونگدان چیقاراررین" دیییپ آلاچالاری آلیپ غالدی. بازاردان دولانیپ گلسم تیلکم یوق، زادام یوق - دیییأر.
اونسونگ عایاللاری اونونگ اوستونه غیغیریپ باشلانلار:
- سن نأهیلی آدام؟ یوغسام بولماندا، هِی، تیلکیدنِم پول آلارمینگ؟ تیلکی بیلن سؤودا ادنی، هِی، موندان اوزال اشِیدیپمیدینگ؟ سن اول تیلکأ اؤزینگی اوینادیپ، آللاتدیریپسینگ دیینلر.
سونگرا عایاللاری اونی سیناماق اوچین سونگکی بازارا چنلی ینه ایکی سانی آلاچا دوقایارلار. اولاری هم خورجونا سالیپ، آغزینی کؤجشدیریپ، اونونگ یابیسی‌نینگ سیرتینا بؤکدریپ، اؤزونی-ده یابیسینا موندوریپ، بازارا اوغرادیارلار. خودای‌بردی‌نینگ بازارا باریانینی گؤرن هألکی تیلکی هاسیر-هوسور غوما آغیناپدیر-دا، ینه اونونگ اؤنگوندن چیقیپدیر.
- های، خودای‌بردی، نیرأ باریارسینگ، هوو؟ - دییییپ غیغیریار.
خودای‌بردی غورقاق:
- من-أ بازارا آلاچا ساتماغا باریارین- دیییأر.
اوندا تیلکی:
- آی، بازارا آلاچا أکیدیپ یؤرندن، مانگا ساتای - دیییأر.
خودای‌بردی غورقاق:
- یوق، یوق من سانگا آلاچامی برمن، اوزال هم آلداپ، پولومی برمه‌دینگ - دیییأر.
اوندا تیلکی:
- من سنی هینگ ماحال آلدان دألدیرین. من بیر سؤزومده دوریأندیرین. اول سنینگ حاقینگی ایین کول تیلکیسیدیر، من بولسا - غوم تیلکیسی آخیری - دیییپ، مونونگ آلاچاسینی الیندن آلیار-دا:
- هألی بازاردان گلیأرکأنگ، شو یرده دورو بِرگین، من پولونگی گتیریپ بررین - دیییأر.
خودای‌بردی غورقاق آلاچانی تیلکأ نسیه بریپ، بازارا گیدی‌بریأر. خودای‌بردی بازارا باریپ، یابیسینی دانگیپ، یولدا آلانگامی آنگسات ساتدیم دیییپ، بازاردا آرقایین گزیپ یؤر اکن. بیردن جوبوسی‌نینگ پولسیزدیگینی یادینا دوشوپ، یانگقی آلاچانی ساتان یرینه - ایزینا غایتماقچی بولیار.
خودای‌بردی غورقاق دررو یابیجیغینی مونیأر-ده، بازارلاپ بأریک غایدیار. اول هألکی آلاچاسینی ساتان یرینه گلیپ گؤرسه، ینه تیلکی یوق. دوروپ-دوروپ، خالیص پتی-بیزاری چیقیار، هیچ گلیأن زات یوق، اول ینه نأعالاچ بولوپ اؤیونه باقا غایدیار. اول اؤیونه یتیپ گلیأرکأ، اونونگ عایاللاری‌نینگ بیری مونی گؤروپ، ایلغاپ اؤنگوندن چیقیپ:
- یِری، آلاچانگی ساغ-آمان ساتدینگمی؟ - دیییپ سورایار.
خودای‌بردی:
- آی، هِلِی، ینه بولان دألدیر، واه، ینه تیلکی آلدادی - دیییپ، یوزونی آشاق ساللاپ اوتوری‌بریأر.
اونسانگ اونونگ عایاللاری "ایندی مونی نأتسککأک؟" دیییپ پیکیر ادیأرلر. آخیری ایکیسی دیل دووشوپ، مونگا باتیرلیغی اؤوره‌تجک بولوپ باشلایارلار. بیر گون آغشام خودای‌بردی عایاللارینا:
- من تیلکیدن غورقیان. منی میدانا أکیدیپ گلینگ - دیییأر.
عایاللاری هم:
- بولیار - دیییپ، مونی میدانا أکیدیأرلر.
اونی اؤیوندن غایراراق چیقاریارلار. خودای‌بردی غورقاق میدانا اوتوریار. عایاللاری‌نینگ هره‌سی بیر غاپدالیندا دوران بولوپ، بیردن، ایکیسی هم غاچیپ غایدیارلار. ایکیسی-ده اؤیه گیریأر-ده، شارق-شورق ایشیگی‌نینگ ایچیندن اوروپ، خودای‌بردینی اؤیه سالمایارلار. خودای‌بردی غورقاق بولسا داشاردا: "واه، هِلِی، ایشیشگی آچ، تیلکی منی اؤلدوریأر-له" دیییپ غورقوپ غیغیریار. عایاللاری بولسا ایشیگی آچمان، اؤیونگ دشیگیندن سیریغی اوزادیپ:
- آل شونونگ بیلن تیلکینی اورو بر! - دیییأرلر.
خودای‌بردی اونی آلیپ، داش-تؤورگینه بولایلاپ تیلکینی یانینا گتیرمأندیر. اونسونگ:
- آی هِلِیلر، ایندی ایشیگی آچایینگ، ایندی منینگ باتیرلیقدا کمیم غالمادی - دیییپ غیغیریار.
عایاللاری بولسا بیر هایوقدان سونگ، ایشیگی آچیارلار. خودای‌بردی غورقاق اؤیونه گیریپ:
- آه، هِلِیلر، شیله باتیر بولدوم، ایندی من هیچ زاتدان غورقمان - دیییأر.
شونلوقدا، گونلرینگ بیرینده خودای‌بردی بیر یره گیدیپ باریار اکن. اونونگ اؤنگوندن بیر اشگینگ توره‌سی چیقیار، اول مونی آلیار-دا، غولتوغینا سالیار. یانه-ده گیدی‌بریأر ولین اؤنگوندن بیر پیشباغا چیقیار، مونی هم آلیاردا، غولتوغیسا سالیار. ینه باریارکا، اؤنگوندن بیر میدان خورازی چیقیار، مونی هم غولتوغینا سالیار. خودای‌بردی بو زاتلاری غولتوغینا سالیپ، گیدیپ باریارکا، بیرنأچه دؤوونگ اوستوندن باریار.
دؤوولر موندان:
- آدینگ نأمه؟ - دیییپ سورایارلار.
- آدیما خودای‌بردی پألوان دییرلر.
- گل، اوندا اوتور.
اول اوتوریار. مونگا دؤولر:
- بیزینگِم بیر پألوانیمیز بار، شونونگ بیلن گؤره‌شیپ بیلرمینگ؟ - دیییأرلر.
- گؤره‌شرین - دیییأر.
دؤولر اؤز دیییأن پألوانینی چاغیریپ، خودای‌بردی بیلن گؤرش توتدورماغا باشلایارلار. بولار گؤرش توتوپ اوغرایارلار. دؤولرینگ پألوانی خودای‌بردی پألوانی غیسیپ، اوورادیپ باریار دیییأر. مونونگ گؤزی پترأپ، آسمانا دیکه‌لیپ اوغراندا، دؤولرینگ پألوانی:
- یری، خودابردی باتیر، نأمه یوقارینگا غارایارسینگ؟ - دیییأر.
- یوقاریق غارایانیمینگ سبأبی، سنی آسمانداکی هایسی ییلدیزینگ یانیندان غایتارسامقام، شول حاقدا اویلانیارین - دیییأر.
اوندا دؤولرینگ پألوانی:
- آیریلاوری، سن منی اؤلدورجک اکنینگ، تویس پألوان اکنینگ، نأمه گرک بولسا آیت، یأنه منی گوی‌برسنگ بولیار - دیییپ آیدیار.
بولار سونگرا خودای‌بردی غورقاغا بیرنأچه زاتلار بریأرلر. اونسونگ خودای‌بردی:
- سیز منینگ بیلن بیتینگیزی دنگشدیریپ بیلرمیسینگیز؟ - دیییأر.
دؤولر:
- گل، دنگشدرسنگ - دیییأرلر.
دؤولر بیر بیت چیقاردیلار ولی، حاقیت یومروق یالی بار دیییأر. خودای‌بردی پألوان بولسا، هألکی یولدان آلان پیشباغانی چیقاریپ غوی‌بری‌بریأر.
دؤولر:
- بأ، بو بیزینگکینگ چنی-چاقی دأل اکن-اوو، غاپاق داغی باغلاپ گیدیپدیر-آی - دیییشیپ، ایچلرینی چکیپ، گنگ گؤروپ، حایران بولوپ دورانلار.
اوندان سونگ خودای‌بردی:
- گلینگ ایندی بورأمیزی دنگشدیره‌لینگ - دیییأر.
دؤولر:
- گلینگ-ده، گلینگ - بولوشیارلار.
دؤولر بوره‌سینی چیقاریارلار ولی، بو هم یومروق یالی بولوپ، پاسیرداپ اوچوپ گیدیأر. خودای‌بردی بولسا: "بوره دیییپ، اینه، مونگا آیدارلار" دیییأر- ده هألکی خورازی چیقاریار ولی، دؤویلرینگ گؤزی خاناسیندان چیقایجاق بولیار.
دؤولر:
- بأ، بویا کِکِچ-مِکِچ باغلاپ گیدیپدیر، بیزینگکی داگی مونونگ یانیندا چاغاسیچا-دا یوق - دیییشیأرلر.
سونگرا خودای‌بردی دؤولره:
- بلکی، غولتیغینگیزینگ غیلینی دنگشدیررسینگیز - دیییأر.
دؤولر هم:
- دنگشدیرأیریس - دیییأرلر.
دؤولر چیقاریپ گؤرکزدیلر ولی، اوزینلیغی بیر سره داغی بار دیییأر.
خودای‌بردی بولسا هألکی اشگینگ تورره‌سینی چیقاریار-دا: "اینه، منینگ غولتوغیمینگ غیلی-ها شونونگ یالی" دیییأر. 
دؤولر حایران غالیپ:
- بأ، مونونگکی تورره-مورره باغلاپ گیدیپدیر-هوو - دیییشیأرلر.
ینه-ده خودای‌بردی:
- سیز منینگ بیلن یرینگ یاغینی چیقاریشجاقمیسینگیز؟ - دیییأر.
دؤولر:
- چیقاریشجاق - دیییأرلر.
اونسونگ خودای‌بردی غورقاق هألکی یومورتغانی دؤولره گؤرکزمأن بیر یره گؤموپ گوییار-دا، سونغام باریپ دپیپ غوی‌بریأر ولی، یومورتغا‌نینگ ساریسی چوغوپ ساریسی چوغوپ چیقدی دورو بِردی.
دؤولر حایران غالیپ:
- پأهِی، بویأ یرینگ یاغینام چیقارایدی، هوو - دیییشیأردیلر.
دؤولرِِم شِیتجک بولوپ نأچه دییسنگ، یری دپیأرلر ولی، یؤنه سارسیپ دور دیییأر، آصیل چیقیان زات یوق.
خودای‌بردی:
- گلینگ، ایندی آغاچ ییقیشالینگ!- دیییأر.
دؤولر:
- گلینگ-ده، گلینگ - بولوشیارشلار.
دؤولر بیر دپیپ غوی‌بریأرلر ولین،بیر آغاچ ییقیلیار. 
خودای‌بردی بولسا گلیأرکأ، یولدان بیر کولتِم یوپ تاپان اکن. آنا، اونسونگ اول شول یوپی آلیار-دا، أهلی آغاچلارینگ داشینا آیلاشدیریپ باشلابریأر.
دؤولر مونی گؤروپ:
- یِری، خودای‌بردی پألوان، سن نأمه ایش اتجک بولیارسینگ؟ - دیییأرلر.
- من سیز یالی یکه-یکه‌دن ییقیپ دورمان، باریسینی بیردن ییقجاق اوتیری‌برجک - دیییأر:
دؤولر:
- آی، زالیوات خودای‌بردی پألوان، غویا وری، بیزینگ آتامیزدان غالان سایالیق آغاچلاریمیزینگ باریندان دیندیرجاق بولیارمینگ - دییشیپ مونی آییریارلار.
اونسونگ دؤولر:
- ایندی سن هم بیزینگ بیلن هم ناهار هم ایییش، شوندا-دا اوتسانگ، بیز سانگا بویون - دیییأرلر.
خودای‌بردی:
- گلینگ بأری، من تاییار - دیییأر.
اونسونگ قریق غولاق‌غازانی پالاودان دولدوریپ، دؤولر بیریگیپ، ایییپ اوغرایارلار ولی، هینگ توکه‌دیپ بیلمه‌یأرلر. غازانی خودای‌بردی‌نینگ اؤنگونده گتیریپ غوییارلار. اولام ایین بولوپ اوغرایار-دا، دؤولر چیقان واغتی چیقیر کؤووپ، غازا‌نینگ ایچیندأکی آشی شونگا دؤکیأر-ده اوتوری‌بریأر. دؤولر ایشیکدن گلنلرینده غازا‌نینگ دویبونی یالان بولوپ دوریار. دؤولر مونی گؤروپ، "به-یه، بویأ-أ اَییأم اییأیپدیر" دیییپ حایرا غالیارلار.
اونسونگ دؤولر:
- مونی آغشام یاتاندا اؤلدوره‌لینگ، شِیدیپ، آغزی‌بیرلیک بیلن یوک ادأیمه‌سک بو بیزه هزیل برمز - دیییپ، اؤزآرا ماصلاحاتلاشیارلار.
آغشام یاتار واغتی بولار ولین، خودای‌بردی هم پوسسونی یاپینیپ یاتیبریأر. اول گیجه اوقا گیدنسونگ، دؤولرینگ اؤلدورمأگه بارجاقدیغینی بیلیپ، پوسسو‌نینگ آشاغینا بیر اولی داشی سالیپ، اوستینی یاپیپ غوییار-دا، اؤزی بیله یانیندا یاتیار. گیجأ‌نینگ بیر واغتی دؤولر باریپ، یانگقی یاتان پوسونلی داشی تایاق بیلن اورماغا باشلایارلار. اولار اوروپ، اوروپ: "ایندی-هأ اؤلدورن بولساق گرک" دییشیپدیرلر.
خودای‌بردی بولسا، ارتیر ایردن دؤولرینگ ایشیگیندن گلیپ:
- بِی، آغشام یاغیشجاغاز شیتیر-پیتیر ادأیدی اؤیدیأن، هیچ آرقایین یاتیپ بیلمه‌دیم-آی - دیییأر.
دؤولر:
- بأ، شونی هم شیتیر-پیتیر بیلیأن بولسا، مونگا نأمه عالاچ اتمک بولارکا؟! - دیییشیپ پیکیرلنیأرلر.
ارتیسی آغشام خودای‌بردی پألوان کوده ادیپ باسیلان چؤپونگ ایچینده یاتیار. ینه دؤولرینگ بارجاغینی بیلیپ، ایچینه اولی بیر داش غویوپ، اؤزی بیله‌ده یاتیار. دؤولر باریپ، چؤپی اوتلایارلار.
اؤزلرِم: "ایندأ-أ دینایان بولساق گرک" دیییشیأرلر. خودای‌بردی پألوان بولسا ارتیسی ینه دؤولرینگ یانینا باریار-دا:
- بأ، آغشام اینیم غاتی غیزدی-اوو، من نأساغلاییپدیرین اؤیدیأن - دیییأر.
دؤولر:
- ایسلأن زادینی بریپ، شونی آمان-ساغ اؤیونه التیپ گله‌لینگ - دییشیپ، خورجونی زاتدان دولدوریپ، بیر دؤوینگِم اوستونه موندیریپ، خودای‌بردی‌نینگ اؤیونه اوغرایارلار. اونی گؤتریپ آلیپ گلیأن دؤو:
- خودای‌بردی پألوان، سن شونچا ایییأرسینگ ولی، هیچ آغرامینگ یوقلا؟ - دیییأر.
اوندا اول:
- آغرامیمی سالاموق، گؤکده یوپوم بار، شوندان آسلیشیپ گلیأرین - دیییأر.
اوندا دؤو:
- هانی، یوپدن آسلیشمان، آغرامینگی آت، گؤره‌گین - دیییأر.
خودای‌بردی‌نینگ بیلینده بیر جانوجاق پیچاغی بار اکن. آلیار-دا شونونگ بیلن دویبو‌نینگ گرشینه باسیبریأر.
دؤو:
- های، آلیوات، یوپونگه یاپیشاوِری! - دیییپ غیغیری‌برِن.
آنا اونسونگ، خودای‌بردی پألوان دؤوی مونوپ، اؤیونه باران.
دؤو بولسا مونی دوشوریپدیر-ده، ایزینا غایدان. گلیأرکأ، اول دؤوونگ اؤنگوندن هألکی مکیر تیلکی چیقیپ:
- یری-اوو، دؤو دوست، نیره‌دن گلیأرسینگ؟ - دیییپ سورایار.
دؤو:
- خودای‌بردی پألوانی اؤیونه التیپ گلیأرین - دیییأر.
تیلکی:
- او نأهیلی پألوان بولیارمیش، اول-آ بیر باریپ‌یاتان غورقاق آخیری.
- آی، یوق، اول زور هوو، بیز-أ اونگا بیر توپار زات بریپ، زوردان سیپدیق.
- بیله بولسا، یؤر، اوندا زادینگیزی آلیپ برگین، سیز اونگا خودای‌بردی پألوان دیییأن بولسانگیز، بیز اونگا خودای‌بردی غورقاق دیییأریس. من مونونگ آلاچاسینی بازارا باریارکا، هر گزک آلداپ الیندن آلیارین - دیین.
دؤو اوندا-دا اینانمایار.
تیلکی دؤوه:
- اینانماسانگ، بوینوما یوپ سال-دا، بیر اوجونی اؤزونگه دانگای - دیییأر.
تیلکی شِیدیپ، بوینوندان یوپ سالدیریپ، دؤوینگ اؤنگونه دوشوپ، خودای‌بردینگ اؤیونه اوغرایار. شول واغت خودای‌بردی تامینگ اوستونه چیقیپ دوران اکن. اول دؤوی ایزینا تیرکأپ گلیأن تیلکینی گؤروپ:
- های تیلکی - دیییپ غیغیریار.
تیلکی خودای‌بردأ هأ بریأر.
خودای‌بردی:
- آتانگ مانگا اوچ دؤو برگیسی بارکا، گتیریأ‌نینگ یکه‌جه دؤومی؟ - دیییپ غیغیران.
یانگقی دؤو:
- سن منی آتانگ برگیسینه برمک اوچین گتیریأن اکنینگ - دیییپ، تیلکی‌نینگ بوینینا دانگیلغی یوپی اؤزونه طاراپ چکیأر-ده، اونی پنجه‌سینه آلیپ، راس یرینگ یوزونه بولاپ اوریار-دا، اؤکجأنی گؤترییأر.
خودای‌بردی شِیدیپ، پألوان هم باتیر آدینی آلانمیش.
کؤچورن: عباس ائلچین