گچینِم اؤز آیاغیندان آسارلار، قوْینام 
بأهلیلی دانانینگ اینیسی هارۇن رشیت اۇلی پاتیشا اکن. اوْل اؤز آغاسی بأهلیلی دانانی یانینا چاغیریپ: 
- آی، بأهلیلی، سن بۇ دیواناچیلیق-گدایچیلیغینگدان ال چک، اینه، سانگا خازینا، نأمه گرک بوْلسا گؤتر - دیین. 
اوْندا بأهلیلی دانا: 
- آی، پاتیشا، بیز هر نیچیک آغا-اینم بوْلساق، سنینگ پاتیشالیق بیلن قازانان مالی-دۆنیأنگدن چیگیت یالی زات درکار دأل، سن یؤنه منی اؤز گۆنۆمه قوْی - دیییپدیر-ده، اؤزۆنینگ ویرانا هوْولۇسینا اؤتأگیدیپدیر. بأهلیلی دانانینگ هوْولۇسی هارۇن رشیت پاتیشانینگ کؤشگۆنه یاقین اکن. هارۇن رشیت هر گۆن تاغتیندا اوْتۇران واغتیندا بأهلیلی دانانینگ آهی-حاسرات بیلن دادی-پریات ادیپ آغلایان غاملی سسینی اشیدر اکن. 
گۆنلرده بیر گۆن هارۇن رشیت تاغتینا چیقیپدیر، گؤرسه بۇ گۆن بأهلیلی دانانینگ هوْولۇسیندان همیشه‌کی اشیدیلیأن غاملی سسینگ درِ‌گینه شاتلیقلی اوْواز گلیأرمیش. بأهلیلی دانا یکه اؤزی اؤز باشینا دألی-پوْرهان بوْلۇپ، هم ساز چالیار، هم آیدیم آیدیار اکن. هارۇن رشیت مۇنی اشیدیپ، گنگیرگه‌نیپ: 
- بارینگ دیوانانی آلیپ گلینگ، اوْندان خابار آلالینگ - دیییپ، یاساوۇللارینا بۇیرۇپدیر. 
یاساوۇللار بأهلیلی دانانی آلیپ گلیپدیرلر. پاتیشا: 
- یری، بأهلیلی، سن همیشه گۆنۆنگی قایغی-غام بیلن آغلاپ گچیریأردینگ، بۇ گۆنکی شاتلیغینگ نأمأنینگ حکایاتی؟ - دیییپ سوْران.
- آی، پاتیشام، اشیدر بوْلسانگ، من بۇ گۆن بازارا باردیم - دیییپ، اوْل سؤزه باشلان. 
- بارسانگ باریپسینگ-دا بازارا، اوْل تایدا نأمه بیله شاتلیق گؤردۆنگ؟ 
- پاتیشام، قاصّاپ بازارینا باردیم، گؤرسم گچینم اؤز آیاغیندان آسیپدیرلار، قوْینام اؤز آیاغیندان آسیپدیرلار. من، ایکیمیز آغا-اینی بوْلانیمیزدان سوْنگ، سنینگ تاغتدا اوْتۇریپ، ایل-خالقا ادیأن ظۇلۇم-سۆتمینگ هم ظالیملیغینگ اۆچین منم گۆنأکأر بوْلیاندیرین اؤیدۆپ قوْرقۇپ، همیشه آغلار یؤرردیم ولین، آصیل بیله دأل اکن. بۇ گۆن من بازاردا گچینینگم اؤز آیاغیندان آسیلیانینی، قوْینۇنگام اؤز آیاغیندان آسیلیانینی گؤردۆم و هر کیمینگ اؤز ادن گۆنأسی اۆچین جزا آلجاغینا دۆشۆندیم. شوْنۇنگ اۆچین هم واغتیم خوْش بوْلۇپ، شاتلانیپ اوْتۇریشیم - دیییپ، جوْغاپ بریپ، چیقیپ گیدن. 

کؤچۆرن: عباس ائلچین

[A:آ،ا- Ä: أ-E:إ، ه - U: ۇ- O: وْ- Ü: ۆ- Ö: ؤ- I:ی- Y:ی]